ព្រះពុទ្ធសាសនា — ស្ពានតភ្ជាប់រវាងមនុស្សជំនាន់មុន និងជំនាន់ក្រោយ

ព្រះធម៌សម្រាប់ការរស់នៅ

ព្រះពុទ្ធសាសនានៅទីក្រុងមែលប៊ន ត្រូវបានគោរព និងប្រតិបត្តិដោយសហគមន៍ជាច្រើន រួមទាំងប្រជាជនខ្មែរអូស្ត្រាលីជាច្រើនជំនាន់ ដែលបន្តរក្សាប្រពៃណីព្រះពុទ្ធសាសនាដែលបាននាំមកពីប្រទេសកម្ពុជា។ ព្រះពុទ្ធសាសនាមានប្រវត្តិយូរលង់ និងមានការបង្រៀនដ៏ទូលំទូលាយ ដូច្នេះទំព័រតែមួយមិនអាចពន្យល់នូវអ្វីៗទាំងអស់ដែលព្រះពុទ្ធបានបង្រៀននោះទេ។

គោលបំណងរបស់យើងនៅទីនេះ គឺសាមញ្ញ

យើងសង្ឃឹមថា គេហទំព័រនេះនឹងអាចក្លាយជា ស្ពានតភ្ជាប់រវាងមនុស្សជំនាន់មុន និងមនុស្សជំនាន់ក្រោយ ដោយនាំយកប្រាជ្ញា បទពិសោធន៍ និងតម្លៃល្អៗដែលចាស់ទុំបានរក្សាទុក មកចែករំលែកជាមួយកូនចៅជំនាន់ថ្មី ដែលកំពុងរស់នៅក្នុងពិភពលោកមួយដ៏ខុសប្លែកពីអតីតកាល។

សម្រាប់គ្រួសារខ្មែរជាច្រើន ព្រះពុទ្ធសាសនាមិនមែនគ្រាន់តែជាសាសនាប៉ុណ្ណោះទេ។ ព្រះពុទ្ធសាសនាបានផ្សារភ្ជាប់យ៉ាងជ្រាលជ្រៅទៅក្នុងរបៀបរស់នៅ ប្រពៃណី ទំនៀមទម្លាប់ ការគោរពចាស់ទុំ ការអាណិតអាសូរចំពោះអ្នកដទៃ និងរបៀបដែលយើងប្រឈមមុខទាំងពេលមានសេចក្តីសុខ និងពេលជួបទុក្ខលំបាក។

អ្នកខ្លះមានជំនឿយ៉ាងមុតមាំលើកម្ម ការចាប់កំណើតជាថ្មី និងជីវិតក្រោយសេចក្តីស្លាប់។ អ្នកខ្លះទៀតប្រហែលជាមិនប្រាកដចិត្ត។ រីឯមនុស្សជំនាន់ថ្មីមួយចំនួន ក៏អាចមានសំណួរអំពីសាសនា និងជំនឿទាំងនេះផងដែរ។

សំណួរទាំងនោះគឺអាចសួរបាន។

ការរៀនព្រះធម៌របស់ព្រះពុទ្ធ មិនចាំបាច់ចាប់ផ្តើមពីការជឿលើអ្វីៗទាំងអស់នោះទេ។ យើងអាចចាប់ផ្តើមពីអ្វីដែលសាមញ្ញជាងនេះ៖

ចេះស្រឡាញ់ និងប្រព្រឹត្តល្អចំពោះអ្នកដទៃ
មានក្តីមេត្តាករុណា
គោរពតម្លៃនៃជីវិត
កុំមានចេតនាបង្កគ្រោះថ្នាក់ដល់អ្នកដទៃ
មានសតិចំពោះគំនិត ពាក្យសម្ដី និងទង្វើរបស់ខ្លួន

ហើយអ្វីដែលសំខាន់បំផុតនោះ គឺរៀនស្វែងយល់អំពីខ្លួនឯង។